Reglur deildar sérhæfðra sjúkraliða
1.gr.: Heiti deildar og starfsvettvangur
Nafn deildarinnar er Deild sjúkraliða með sérnám. Deild sjúkraliða með sérnám er deild innan Sjúkraliðafélags Íslands. Starfsvettvangur deildarinnar og verkefni er að þjónusta alla sem lokið hafa a.m.k. eins árs sérnámi og hafa rétt til að bera starfsheitið sjúkraliði. Heimili og varnarþing deildarinnar er Reykjavík.
2. gr.: Réttur til aðildar að deildinni
Aðild að deildinni eiga allir sjúkraliðar í Sjúkraliðafélagi Íslands sem hafa lokið fagdiplómaprófi eða sambærilegu námi, og hafa rétt til að bera starfsheitið sérhæfður sjúkraliði.
3. gr.: Lög deildarinnar
Lög Sjúkraliðafélags Íslands eru jafnframt lög deildarinnar og félagsmanna hennar, eftir því sem við á. Reglur þessar skulu ávallt vera í samræmi við lög félagsins.
4. gr.: Hlutverk deildarinnar
Hlutverk deildarinnar og markmið eru þau sem kveðið er á um í 2. kafla laga Sjúkraliðafélags Íslands og ber deildinni og forystu hennar að vinna að framgangi þeirra stefnumiða á sínum starfsvettvangi með því að:
- halda uppi öflugu fræðslu og menningarstarfi innan vébanda sinna
- efla gagnkvæman skilning og einingu meðal félagsmanna og annarra launamanna
- veita félagsstjórn aðstoð við söfnun gagna og upplýsinga og annað sem hún kann að óska eftir.
5. gr.: Stjórn deildarinnar
Stjórn deildarinnar skal kosin til tveggja ára á aðalfundi. Formaður er kosinn sérstaklega, en aðrir fulltrúar í stjórn skipta með sér verkum. Endurkjör stjórnarfulltrúa er heimilt.
6. gr.: Störf stjórnar
Stjórn deildarinnar er tengiliður milli félaga deildarinnar og félagsstjórnar Sjúkraliðafélags Íslands. Formaður fagdeildar sérhæfðra sjúkraliða, hefur rétt á að sitja fundi félagsstjórnar með málfrelsi og tillögurétt ef á dagskrá hennar eru málefni er varða deildina eða félagsmenn hennar sérstaklega. Að loknu stjórnarkjöri skal formaður boða til stjórnarfundar. Stjórn skiptir með sér verkum.
7. gr.: Fjármál
Stjórn deildarinnar skal gera fjárhagsáætlun og leggja fyrir aðalfund til samþykktar. Beiðni um fjárframlag úr aðalsjóði Sjúkraliðafélags Íslands, samkvæmt samþykktri fjárhagsáætlun skal senda framkvæmdastjórn fyrir 1. febrúar ár hvert.
8. gr.: Aðalfundur deildarinnar
Aðalfundur deildarinnar skal haldinn árlega á tímabilinu september – desember.
Ársskýrsla deildarinnar skal senda framkvæmdastjórn fyrir 1. febrúar ár hvert ásamt fjárhagsáætlun og fjárbeiðni.
Til aðalfundar skal boða með a.m.k. 2 vikna fyrirvara. Fundurinn skal auglýstur á tryggilegan hátt. Þess skal getið í fundarboð hverjir séu í kjöri til formanns deildarinnar.
Dagskrá aðalfundar:
- Kosning fundarstjóra.
- Skýrsla stjórnar um starfsemi deildarinnar.
- Fjárhagsáætlun deildarinnar fyrir næsta starfsár.
- Kosning formanns.
- Kosning stjórnar.
- Kosning fulltrúa deildarinnar til setu á fulltrúaþingi Sjúkraliðafélags Íslands samkvæmt ákvæðum 15. gr. laga félagsins.
- Önnur mál.
9. gr.: Deildarfundir
Deildarfundi skal halda svo oft sem þurfa þykir. Deildarfundi skal boða með minnst þriggja sólarhringa fyrirvara með tryggilegum hætti.
Stjórn deildarinnar er skylt að boða til deildarfundar ef fimmtungur félagsmanna deildarinnar krefst þess og tilgreinir fundarefni.
10. gr.: Breyting á reglum deildarinnar
Reglum má aðeins breyta á fulltrúaþingi. Tillögur til breytinga á þessum reglum skulu hafa borist stjórn Sjúkraliðafélags Íslands eigi síðar en sex vikum fyrir fulltrúaþing. Breytingar á reglunum öðlast ekki gildi fyrr en þær hafa hlotið staðfestingu fulltrúaþings Sjúkraliðafélags Íslands, að fenginni umsögn laganefndar félagsins
Reglur deildarinnar voru samþykktar á stofnfundi Fagdeildar sjúkraliða með sérnám í hjúkrun í Borgarleikhúsinu 21. desember 2002 með fyrirvara um að lög Sjúkraliðafélags Íslands breytist og heimili stofnun deildarinnar.
Fulltrúaþing 29. apríl 2025 og samþykktar þannig breyttar.
Reglur deildarinnar lagðar fram á fulltrúaþingi SLFÍ 31. maí 2007 og samþykktar þannig breyttar.
Reglur deildarinnar lagðar fram á fulltrúaþingi 12. maí 2022 og samþykktar þannig breyttar